ALDEEk euskaraz argitaratu du Robert J. Glushkoren 'The discipline of organizing'

Ezagutza antolatzeko eta informazio digitala ustiatzeko joera-aldaketa azkarren aurrean, atzean ez gelditzeko erreferentzia-eskuliburua da Robert J. Glushkoren 'The discipline of organizing', edo, hemendik aurrera, 'Antolatzearen diziplina' tituluarekin ezagun egingo dena gure artean ALDEEk, Artxibo, Liburutegi eta Dokumentazio Zentroetako Profesionalen elkarteak, argitaratu berri baitu euskarazko itzulpena. Lan hau euskaraz eskuragarri izatea gure esparruko profesionalentzat funtsezkoa izango da informazioa antolatzeko prestakuntzari dagokionez.

Azken hamarkadan, informazio digitalaren ezagutzaren antolaketari eta ustiapenari buruzko material berriak agertu dira; horien artean The discipline of organizing nabarmentzen da, objektu informatibo digitaletan bereziki aplika daitezkeen antolaketa-sistemen esparru orokorra jorratzen duen erreferentziazko eskuliburua.

Hainbat arlotan (liburutegiak, artxiboak, museoak, argitalpen digitala, informazioa berreskuratzea, edukiak kudeatzea, informazio-zerbitzu digitalak diseinatzea) azpian dauden alderdi kontzeptualak modu integratuan aurkezten dituen obra da, eta informazioa eskuratu, biltegiratu eta deskubritu ahal izateko gizarteak duen etengabeko erronkaren oinarri partekatuak azaltzen ditu.

Antolatzearen diziplina

ALDEEk, Antolatzearen diziplina goiburuarekin euskarara itzuli duen liburua anbizio handiko lana da, The discipline of organizing liburuaren 2013ko lehen edizioa, TDO book izenaz ezaguna, ASIS & T-k (Association for Information Science and Technology) information science alorreko urteko liburua dela aitortu baitzuen. Informazio digitalaren arloko erreferentziazko argitalpen-zigiluetan berrargitaratu da, hala nola O 'Reilly-n eta MIT-en edo Berkeleyko Unibertsitatean, eta laugarren edizioa du dagoeneko.

Lan hau gorabidean dauden arloen ikuspegiak txertatzen joan da pixkanaka, hala nola datu-zientzia, web-posiziondua edo datu-webgunea, eta gidaliburu bat sortu du, hiztegi partekatu bat proposatzen duena, bibliotekonomia eta dokumentazioa bezalako eremu klasikoetatik informazio-aktiboen kudeaketa korporatibora edo datu publiko irekien kudeaketara lotzen duena.

Gaur egun, informazioa nonahikoa da eta ia edozein elkarrekintzari lotuta dago, eta, horregatik, jakintzat jotzen da edo naturalizatu egiten da, prozesuen berezko emaitza bat balitz bezala. Milioika pertsonak webguneak sortzen dituzte eta haietan nabigatzen dute, blogak egiten dituzte, etiketatu egiten dute, txioka aritzen dira eta era guztietako komunikabideetako edukiak kargatu eta deskargatzen dituzte, "informazioa antolatzen ari naiz" edo "datuak biltzen ari naiz" pentsatu gabe. Funtsean, informazioaren arkitektura duten produktuak sortzen dituzte.

Bada, liburu honen egileen ustez, ideia nagusietako bat da diziplina akademikoetan eta ikasketa-planetan izaten diren informazioaren antolaketa eta informazioaren berreskurapena bereiztea gaur egun ez dela lehen bezain garrantzitsua. "TDO book" lanak, adituek argi azaldu dutenaren arabera: "banaketa gutxi ditu informazioaren antolaketaren (IO) eta informazioaren berreskurapenaren (IR) artean. Aldiz, antolamendu-sistemen diseinuan eta hedapenean dauden erronkak eta funtsezko kontzeptuak azaltzen ditu, IO eta IRren arteko harremanak eta konpentsazioak etengabe azpimarratzeko. Antolamendu-sistemaren kontzeptuak diseinuaren dimentsioak eta erabakiak nabarmentzen ditu, zeinak kolektiboki zehazten baitituzte baliabideen antolamenduaren irismena eta izaera, bai eta antolatutako baliabideak konparatzen, konbinatzen, eraldatzen eta haiekin elkarreragiten duten prozesuen gaitasunak ere".

Paperean eta online

The discipline of organizing O'Reilly Media Inc. argitaletxeak argitaratua eta CC-BY-NC lizentziapean banatua izan da, eta, dagoeneko, FESABIDek eta Espainiako hainbat unibertsitatek itzuli eta digitalki argitaratu dituzte liburuaren hiru kapitulu gaztelaniaz (Organización y descripción de recursos de información digital).

ALDEEn uste dugu lan hau osorik euskaratzea eta gure lanbidearekin zerikusi handiena duten hori atalak paperean argitaratzea 30. urteurreneko opari ona izan daitekeela. Hori dela eta, azaroaren 20an, San Telmo Museoan ospatuko dugun urtemuga ekitaldian aurkeztu eta banatuko dugu liburua bertaratzen diren bazkideen artean.

Bertan jaso ezin duten bazkideek EAEko hiriburuetako liburutegi nagusietan jasotzeko modua izango dute azaroaren 30etik aurrera (aurrerago jakinaraziko dugu zehazki nora jo behar duten bazkideek liburua jasotzera).

Horrez gain, laster liburu osoaren euskarazko edizio elektronikoa eskuragarri egongo da ALDEEren webguneko argitalpenen atalean, hiru formatu hauetan: HTML, ePUB eta PDF.